കഴിഞ്ഞ ദിവസം റോട്ടറി ഇന്റർനാഷനൽ സംഘടിപ്പിച്ച പരിപാടിക്കിടെ ബിസിനസ് മോട്ടിവേറ്റർ അനിൽ ബാലചന്ദ്രനെ കയ്യേറ്റം ചെയ്യാൻ ശ്രമം. പ്രസംഗത്തിനിടയിൽ ബിസിനസുകാരെ തെണ്ടികൾ എന്നുവിളിച്ചതിനെ തുടർന്ന് സദസിൽനിന്ന് ആളുകൾ ഇടപെട്ടു. പരിപാടി നിർത്തിവയ്ക്കണമെന്ന് ആവശ്യപ്പെട്ട് അനിലിനെ കയ്യേറ്റം ചെയ്യാനും ശ്രമിച്ചു.
ഇതോടെ സംഘാടകർ ഇടപെട്ട് പരിപാടി നിർത്തിവയ്ക്കുകയായിരുന്നു. ഉച്ചയ്ക്കു നടക്കേണ്ട പരിപാടിയിൽ മതിയായ ശ്രോതാക്കളില്ലെന്നു പറഞ്ഞ് അനിൽ ബാലചന്ദ്രൻ ഹോട്ടലിൽ നിന്ന്
വേദിയിലേക്ക് വരാൻ വിസമ്മതിച്ചിരുന്നു. തുടർന്ന് സംഘാടകർ ഇടപെട്ട് അനുനയിപ്പിച്ചാണ് വേദിയിലേക്ക് കൊണ്ടുവന്നത്. ഒരു മണിക്കൂർ വൈകിയായിരുന്നു പരിപാടി തുടങ്ങിയത്.
പ്രസംഗം തുടങ്ങി വൈകാതെ തന്നെ ഇയാൾ സംഘാടകരെയും, ശ്രോതാക്കളെയും മോശമായി പരാമർശിക്കാൻ തുടങ്ങി. ബിസിനസുകാരെ തെണ്ടികൾ എന്നു വിളിച്ചതോടെയാണ് ശ്രോതാക്കൾ പ്രകോപിതരായത്. പ്രസംഗം തുടരേണ്ടതില്ലെന്ന് ആളുകൾ വ്യക്തമാക്കി. സംഘർഷത്തിലേക്ക് നീങ്ങിയതോടെ അനിലിനെ വാഹനത്തിൽ കയറ്റിക്കൊണ്ടുപോകുകയായിരുന്നു.
