ലോക്സഭാ തെരഞ്ഞെടുപ്പിന് മുന്നോടിയായി കോൺഗ്രസിന് വലിയ തിരിച്ചടിയായി, മധ്യപ്രദേശിലെ ചിന്ദ്വാര ജില്ലയിലെ അമർവാരയിൽ നിന്നുള്ള മൂന്ന് തവണ എംഎൽഎയായ കമലേഷ് ഷാ വെള്ളിയാഴ്ച ഭരണകക്ഷിയായ ബിജെപിയിൽ ചേർന്നു.
ഏപ്രിൽ 19 ന് ആദ്യഘട്ടത്തിൽ വോട്ടെടുപ്പ് നടക്കുന്ന ചിന്ദ്വാര കോൺഗ്രസ് നേതാവും മുൻ മുഖ്യമന്ത്രിയുമായ കമൽനാഥിൻ്റെ സ്വന്തം ജില്ലയാണ്. പാർട്ടി ദേശീയ ജോയിൻ്റ് ജനറൽ സെക്രട്ടറി ശിവപ്രകാശ്, മുഖ്യമന്ത്രി മോഹൻ യാദവ്, സംസ്ഥാന അധ്യക്ഷൻ വിഷ്ണു ദത്ത് ശർമ എന്നിവർ ചേർന്നാണ് കമലേഷ് ഷായെ ബിജെപിയിലേക്ക് സ്വാഗതം ചെയ്തത്.
മൂന്ന് തവണ കോൺഗ്രസ് എംഎൽഎയായ അദ്ദേഹം ഭാര്യ ഹരായി നഗർ പാലിക ചെയർപേഴ്സൺ മാധ്വി ഷാ, സഹോദരിയും ജില്ലാ പഞ്ചായത്ത് അംഗവുമായ കേസർ നേതം എന്നിവർക്കൊപ്പമാണ് ബിജെപിയിൽ ചേർന്നത്.
പ്രധാനമന്ത്രി നരേന്ദ്ര മോദിയുടെ വികസന പ്രവർത്തനങ്ങളിൽ ആകൃഷ്ടരായാണ് കമലേഷ് ഷായും കുടുംബാംഗങ്ങളും ബിജെപിയിൽ ചേർന്നതെന്ന് ബിജെപി നേതാവ് പറഞ്ഞു. സംസ്ഥാന ബിജെപിയുടെ ലോക്സഭാ തിരഞ്ഞെടുപ്പ് ചുമതലയുള്ള മഹേന്ദ്ര സിംഗ്, ജോയിൻ്റ് ഇൻചാർജ് സതീഷ് ഉപാധ്യായ, മുതിർന്ന മന്ത്രി കൈലാഷ് വിജയവർഗിയ തുടങ്ങിയവർ ചടങ്ങിൽ പങ്കെടുത്തു.
