ഹേമ കമ്മിറ്റി റിപ്പോര്ട്ടില് ലൈംഗികാതിക്രമ പരാമര്ശമുള്ള എല്ലാവരുടെയും പേര് വെളിപ്പെടുത്തണം, അംഗങ്ങളുടെ അറസ്റ്റുണ്ടായാല് അച്ചടക്ക നടപടികള് സ്വീകരിക്കും‘ഫെഫ്ക’.
ഹേമ കമ്മിറ്റി റിപ്പോര്ട്ടില് ലൈംഗികാതിക്രമ പരാമര്ശമുള്ള എല്ലാവരുടെയും പേര് പുറത്തുവരണമെന്നും, സിനിമാ സാങ്കേതിക പ്രവര്ത്തകരുടെ സംഘടനയായ ഫെഫ്ക്കയിലെ അംഗങ്ങളുടെ അറസ്റ്റുണ്ടായാല് അച്ചടക്ക നടപടികള് സ്വീകരിക്കുമെന്നും ഫെഫ്ക വ്യക്തമാക്കി.
‘അമ്മ’ എക്സിക്യൂട്ടീവ് കമ്മിറ്റി ഒന്നാകെ രാജിവെച്ചത് ആ സംഘടന വിപ്ലവകരമായി നവീകരിക്കപ്പെടുന്നതിന്റെ തുടക്കമാവട്ടെയെന്ന് പ്രത്യാശിക്കുന്നുവെന്നും ഫെഫ്ക. അതിജീവിതകള്ക്ക് സഹായം നല്കാന് സ്ത്രീ അംഗങ്ങളുടെ കോര് കമ്മിറ്റിയെ ചുമതലപ്പെടുത്തുമെന്നും ഫെഫ്കയുടെ പ്രതികരണത്തിലുണ്ട്. അതിജീവിതകൾക്ക് ഭയാശങ്കകളെ അകറ്റാന് ക്ലിനിക്കല് സൈക്കോളജിസ്റ്റിന്റെ സേവനം ലഭ്യമാക്കുമെന്നും ഫെഫ്ക വ്യക്തമാക്കി.
അതേസമയം, ചലച്ചിത്ര അക്കാദമി മുന് ചെയര്മാനും സംവിധായകനുമായ രഞ്ജിത്തിനെതിരെ ഉടന് നടപടി ഇല്ലെന്നും അന്വേഷണത്തില് കഴമ്പുണ്ടെന്ന് വ്യക്തമായാല് മാത്രമായിരിക്കും നടപടിയെന്നുമാണ് കഴിഞ്ഞ ദിവസം ഫെഫ്ക പ്രതികരിച്ചത്.
