ക്രൂരമായ റാഗിങിനിരയായ വയനാട് പൂക്കോട് വെറ്ററിനറി കോളേജ് വിദ്യാർത്ഥി സിദ്ധാർത്ഥൻ മരിച്ചിട്ട് ഇന്ന് ഒരു വർഷം. സിദ്ധാര്ത്ഥന്റെ മരിച്ച് ഒരു വര്ഷം പിന്നിടുമ്പോഴും നീതി അകലെയെന്നാണ് മാതാവ് ഷീബക്കും പിതാവ് ജയപ്രകാശിനും പറയാനുള്ളത്. എസ്എഫ്ഐ പ്രവർത്തകരടക്കം 18 പേർ പ്രതികളായ കേസ് അട്ടിമറിക്കാൻ തുടക്കം മുതല് പലതവണയും ശ്രമം നടന്നിരുന്നു. പ്രതികള്ക്ക് പഠനം തുടരാനുള്ള ഇടപെടല് ഹൈക്കോടതി ഡിവിഷൻ ബെഞ്ച് തടഞ്ഞതാണ് കേസില് ഒടുവില് നടന്നത്.
2024 ഫെബ്രുവരി 18 നാണ് തിരുവനന്തപുരം സ്വദേശിയായ സിദ്ധാർത്ഥനെ പൂക്കോട് വെറ്റിനറി കോളേജിലെ ഹോസ്റ്റലിലെ ശുചിമുറിയില് തൂങ്ങി മരിച്ച നിലയില് കണ്ടെത്തിയത്
തൂങ്ങിമരണമെന്ന് വിധിയെഴുതിയ കേസ് പിന്നെ വഴിമാറിയത് റാഗിംഗ് ഭീകരതയിലേക്ക് ആണ്. സഹപാഠികളും സീനിയര് വിദ്യാര്ത്ഥികളും ചേര്ന്ന് സിദ്ധാര്ത്ഥനെ പരസ്യവിചാരണ ചെയ്തു. ദിവസങ്ങളോളം നീണ്ട ക്രൂര മര്ദനങ്ങള്ക്ക് ഒടുവില് ആണ് ഹോസ്റ്റലില് സിദ്ധാര്ത്ഥനെ തൂങ്ങിമരിച്ച നിലയില് കണ്ടെത്തിയത്. പതിനാറാം തീയ്യതി മുതല് എസ്എഫ്ഐ പ്രവർത്തകരടക്കമുള്ളവരില് നിന്ന് പാറപ്പുറത്തും മുറിയിലും വച്ച് സിദ്ധാർത്ഥൻ ക്രൂരമായി മര്ദ്ദിക്കപ്പെട്ടു. അടിവസ്ത്രം മാത്രം ധരിക്കാൻ അനുവദിച്ച് പരസ്യവിചാരണ ചെയ്തു. ബെല്റ്റും മൊബൈല്ഫോണ് ചാർജറുകളും വച്ച് അടിക്കുകയും ശരീരത്തില് പലതവണ ചവിട്ടി പരിക്കേല്പ്പിക്കുകയും ചെയ്തു. പിന്നാലെയാണ് ഹോസ്റ്റലിലെ ശുചിമുറിയില് തൂങ്ങിയനിലയില് മൃതദേഹം കണ്ടെത്തിയത്. കേസിൽ 9 വിദ്യാര്ത്ഥികള് അറസ്റ്റിലായി. പ്രതികളായ 17 പേരെ പരീക്ഷ എഴുതാന് അനുവദിച്ച സിംഗിള് ബെഞ്ച് വിധി ഈയടുത്ത് ഹൈക്കോടതി ഡിവിഷന് ബെഞ്ച് സ്റ്റേ ചെയ്തിരുന്നു. മരണത്തില് സിബിഐ അന്വേഷണവും പുരോഗമിക്കുകയാണ്.
