കെ.എസ്.ആർ.ടി.സി ഒരു മാറ്റത്തിന്റെ പാതയിലാണെന്ന് മന്ത്രി കെ.ബി.ഗണേഷ് കുമാർ. ആറേഴ് മാസത്തിനുള്ളിൽ കെ.എസ്.ആർ.ടി.സി. കേരളത്തിലെ ജനങ്ങളെ ഞെട്ടിക്കും. അതിൽ ഒരു സംശയവും വേണ്ട. അത്തരം ഗംഭീരമായ പദ്ധതികളാണ് വരുന്നതെന്നും അദ്ദേഹം പറഞ്ഞു. തിരുവനന്തപുരത്ത് എമർജൻസി മെഡിക്കൽ കെയർ യൂണിറ്റ് ഉദ്ഘാടനം ചെയ്ത് സംസാരിക്കുകയായിരുന്നു ഗതാഗത മന്ത്രി കെ ബി ഗണേഷ് കുമാർ.
കെ.എസ്.ആർ.ടി.സിയിലെ മുഴുവൻ ജീവനക്കാരേയും മെഡിക്കൽ പരിശോധനയ്ക്ക് വിധേയരാക്കണമെന്ന് മന്ത്രിയായപ്പോൾ തന്നെ ആഗ്രഹമുണ്ടായിരുന്നു. പല ജീവനക്കാരും ജോലിക്കിടയിൽ ആശുപത്രിയിലാകുക, കുഴഞ്ഞുവീണ് മരിക്കുക തുടങ്ങി വേദനാജനകമായ ഒരുപാട് സംഭവങ്ങൾ ഉണ്ടായിട്ടുണ്ട്. വണ്ടി ഓടിച്ചുവരുന്ന ഡ്രൈവർക്കും കണ്ടക്ടർക്കും പലതരത്തിലുള്ള ബുദ്ധിമുട്ടുകളും നേരിടുന്നുണ്ട്.
