ഇസ്രയേൽ സന്ദർശനത്തിനെത്തിയ പ്രധാനമന്ത്രി നരേന്ദ്ര മോദിക്ക് ആവേശകരമായ സ്വീകരണമാണ് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു നൽകിയത്. അത്താഴവിരുന്നിന് മുന്നോടിയായി പരമ്പരാഗത ഇന്ത്യൻ വസ്ത്രം ധരിച്ചെത്തി നെതന്യാഹു തന്റെ സുഹൃത്തായ മോദിയെ അത്ഭുതപ്പെടുത്തി. ഇതിന്റെ വീഡിയോ നെതന്യാഹു തന്നെ സോഷ്യൽ മീഡിയയിൽ പങ്കുവെച്ചു. ഇസ്രയേൽ പാർലമെന്റിനെ അഭിസംബോധന ചെയ്ത ആദ്യ ഇന്ത്യൻ പ്രധാനമന്ത്രിയായി മോദി ചരിത്രം കുറിച്ചു.
പ്രധാനമന്ത്രി മോദിയെ ‘സഹോദരൻ’ എന്ന് വിശേഷിപ്പിച്ച നെതന്യാഹു, 2023 ഒക്ടോബർ 7-ലെ ഹമാസ് ആക്രമണത്തിന് പിന്നാലെ ഇന്ത്യ നൽകിയ ഉറച്ച പിന്തുണയെ പ്രശംസിച്ചു. ഭീകരാക്രമണത്തെ അപലപിക്കാൻ മടിക്കാത്ത ആദ്യ ലോകനേതാക്കളിൽ ഒരാളാണ് മോദിയെന്ന് അദ്ദേഹം ഓർമ്മിപ്പിച്ചു. ലോകവേദിയിലെ മികച്ച നേതാവാണ് മോദിയെന്നും ഇസ്രയേലിനും ജൂതജനങ്ങൾക്കും ഒപ്പം പതറാതെ നിലകൊണ്ടതിന് അദ്ദേഹം നന്ദി അറിയിക്കുകയും ചെയ്തു.
വിമാനത്താവളത്തിൽ നടന്ന സ്വീകരണത്തിനിടെയുണ്ടായ രസകരമായ സംഭവങ്ങളും ഇതിനോടകം വൈറലായിട്ടുണ്ട്. നെതന്യാഹുവിന്റെ ഭാര്യ സാറ നെതന്യാഹു ധരിച്ചിരുന്ന വസ്ത്രത്തിന്റെ നിറവും മോദിയുടെ പോക്കറ്റ് സ്ക്വയറും തമ്മിലുള്ള സാമ്യം നെതന്യാഹു ചൂണ്ടിക്കാട്ടി. അത് ‘കാവി’ നിറമാണെന്ന് മോദി വിശദീകരിക്കുകയും ചെയ്തു. ഇന്ത്യയെ ‘അത്ഭുതങ്ങളുടെ രാജ്യം’ എന്നാണ് സാറ വിശേഷിപ്പിച്ചത്. സന്ദർശനത്തിന്റെ ഭാഗമായി പ്രസിഡന്റ് ഐസക് ഹെർസോഗുമായും പ്രധാനമന്ത്രി മോദി കൂടിക്കാഴ്ച നടത്തും.
