ആർഎസ്എസ് നേതാവുമായി കൂടിക്കാഴ്ച നടത്തിയെന്ന് എഡിജിപി എം.ആർ. അജിത് കുമാർ സമ്മതിച്ചു.സ്വകാര്യ സന്ദര്ശനമായിരുന്നുവെന്നാണ് വിശദീകരണം. ആര്എസ്എസ് പോഷക സംഘടനയായ വിജ്ഞാന ഭാരതിയുടെ മലയാളിയായ ദേശീയ ഭാരവാഹി ഓടിച്ച വാഹനത്തിലാണ് എഡിജിപി ആര്എസ്എസുമായുള്ള കൂടിക്കാഴ്ചയ്ക്ക് എത്തിയത്. ഇക്കാര്യം സ്പെഷ്യല് ബ്രാഞ്ച് ഡിജിപിയേയും,ഇന്റലിജന്സ് മേധാവിയെയും സര്ക്കാറിനേയും അന്നേ അറിയിച്ചുവെന്നാണ് വിവരം.
പ്രതിപക്ഷ നേതാവ് വി ഡി സതീശനാണ് എഡിജിപി- ആര്എസ്എസ് കൂടിക്കാഴ്ചയുടെ വിവരങ്ങള് പുറത്തുവിട്ടത്. കേന്ദ്ര അന്വേഷണം ഏജന്സികളുടെ ഇടപെടല് തടയാനായി മുഖ്യമന്ത്രിയുടെ അറിവോടെ കൂടിക്കാഴ്ച നടന്നെന്നും തൃശൂര് പൂരം അലങ്കോലപ്പെടുത്താനുള്ള തീരുമാനം ഉള്പ്പെടെ ഈ കൂടിക്കാഴ്ചയുടെ ഭാഗമായിരുന്നെന്നുമാണ് വി ഡി സതീശന് ആരോപിച്ചിരുന്നത്. ഇത് ചര്ച്ചയായ പശ്ചാത്തലത്തിലാണ് മുഖ്യമന്ത്രിയുടെ ഓഫിസ് അജിത് കുമാറിനോട് വിശദീകരണം തേടിയത്. ഇതിന് സര്ക്കാരിനെ വെട്ടിലാക്കുന്ന മറുപടിയാണ് ഇപ്പോള് എഡിജിപി നല്കിയിരിക്കുന്നത്. ആര്എസ്എസ് നേതാവുമായി കൂടിക്കാഴ്ച നടത്താന് എഡിജിപി സ്വകാര്യ വാഹനത്തില് പോയത് അറിഞ്ഞിട്ടും വിഷയത്തില് സര്ക്കാര് കണ്ണടച്ചെന്നാണ് ഇപ്പോള് ഉയരുന്ന ആരോപണം.
